Mokgwa wa Boetapele wa DPW –Mokgwa o moswa wa go dira Mošomo
Kgoro ya Bosetšhaba ya Mešomo ya Setšhaba, RSA
Dikagare Letlakala
Matseno………………………………………………………….3
Maikemišetšo a Mokgwa wa Boetapele...…………………...3
Ditlhohlo………………………………………………………….3
Mehola……………………………………………………………4
Maitshwaro a bolaodi.……………………………………….… 7
Maitshwaro a badirišani ………………………………...……10
Ditlamorago…………………………………………………...12
Tshepetšo ya Bolaodi ……………………………………12
STAR, mokgwa wa go rarolla mathata……….……………13
Phethagatšo……………………………………………………15
Bofelo…………………………………………………………15
Letlakala la tshaeno ……………………………………….16
Matseno
Kgoro ya Bosetšhaba ya Mešomo ya Setšhaba e gona go phethagatša taolelo ye itšego ya mmušo wa Afrika Borwa ye e kgethilwego ka morago ga dikgetho tša pele tša naga tša temokrasi ka ngwaga wa 1994. DPW ga e e šome e le nnoši. Ke karolo ya mmušo o moswa woo mošomo wa wona o akaretšago kgodišo ya ikonomi, go hlola mešomo, g fokotša le go fediša maemo a bodiidi. Dikgoro ka moka tša mmušo di nyakega gore di neele go dikgopolo/dikakanyo tša tlhabollo ya mmušo o moswa. DPW e swanetše go fetola mokgwa woo e šomago ka gona gore e sepelelane le maikemišetšo a tlhabollo ye ntshwa ya mmušo o moswa.
TMC e biditše wekšopo ya matšatši a mabedi ya thulaganyo ya MANCO go maloko kua Kievits Kroon, ka ntle ga Tshwane, go tloga ka 24 go fihla ka 26 Nofemere 2004. Maikemišetšo a wekšopo yeo e be e le go go dira tshekatsheko ya gore re be re le kae bjalo ka Kgoro le go kwišiša ditlhohlo tšeo DPW e bego e lebane le tšona. Wekšopong yeo re kwišišitše gore DPW e lebane le ditlhohlo tše ntši ka gare le ka ntle.
Maikemišetšo a Mokgwa wa Boetapele
Maikemišetšo a Mokgwa wa Boetapele ke go ala motheo wa phetošo ya mokgwa woo Kgoro e šomago ka gona. E thoma tshepetšo ya go hlama maemo a mošomo woo a ka se hlahlego fela eupša a tlago laola mokgwa woo maloko a lapa la DPW a tla šomago le go iswarago ka gona. Mokgwa wa Boetapele e hlagiša dikgopolo tše ntši, go akaretša le kakanyo ya 'lapa la DPW', go leka go fetola maitshwaro ka kgorong.
E tee ya ditlhohlo tše kgolo ka gare ke gore go hlokega balaodi bagolo go fetola ka mokgwa woo re laolago kgoro ka gona, eupša se bohlokwa ke ka mokgwa woo re laolago le go thekga badirišani ba rena. Mokgwa wa boetapele o tla thuša go dira gore kgoro e be le bokgoni le go feta le gore e be mongmošomo wa go ratwa ke madiredi ba rena.
Katlego ya Mokgwa wa Boetapele e tla tšwa go ka mokgwa woo leloko le lengwe le le lengwe la lapa la DPW, rena ka moka, re fetolago ka moo re dirago mošomo wa rena ka gona.
Ditlhohlo
DPW e lebagane le ditlhohlo tše ntši tšeo di akaretšago tše di latelago:
Moya wa fase wa badirišani
Go ba le pelopedi ka ga mošomo wa kgoro
Go se kgotsofale ga badirelwa ba kgoro
Tlhokego ya maikarabelo
Tlhokego ya didirišwa tše di lekanetšego tša babalela matlotlotlengwa a mmušo
Tlhokagalo ya moya wa maemo a godimo wa kabelo ya ditirelo
Go ba gona ga ditšo le maitemogelo a go fapafana
Tlhokego ya kabelano ya ponelopelo
Maemo a go fokola a mošomo go badirišani ba rena, kudukudu diofising tša tikologo
Ditlhohlo tše ka moka di a kopana go šitiša teko efe goba efe ya rena ya go kaonafatša kabelo ya ditirelo. Maemo a a mpefatša ke taba ya gore maitshwaro a balaodi le mokgwa ga o swane gape ga o laetše tšwelopele mabapi le go fetola kgoro. Go fetola maitshwaro a bolaodi le moya wo go tlile go tšea sebaka se se telele go kanafatša maemo a mošomo go badirišani ka moka ba rena. Se ke se Mokgwa wa Boetapele o tlilego go nyaka go se fihlelela.
Melawana
Matseno
Melawana ke motheo wa mokgatlo o mongwe le o mongwe. E neelana ka motheo woo ka wona maitshwaro le ditiro di ka sekasekwago ka gona. Ken Blanchard, ka pukung ya gagwe ya Managing by values, ore "Boitshwaro e ba molaodi o moswa mokgatlong". Go ra gore se sengwe le se sengwe se re tlago se dira se tlhahlwa ke melawana ye. Ge re lebana ke ditlhohlo le dikgetho tše thata, re tlile go šomiša maitshwaro a go re thuša go humana dikarabo. Melawana ye e latelago e tla ba methao ye e tla re tlamago le go re hlahla mo lapeng le le le kopantšwego la DPW. Ka moka ga rena re tlile go holofelwa go šomiša melawana ye mešomong ye mengwe le ye mengwe ye re e dirago.
Kgokagano
Balaodi ka moka ba tla kgopelwa go kgokagana ka mehla, gabotse le ka tokologo le balaodimmogo-ka-bona le badirišani ba bona go sa kgethe gore modirišani ke DG goba molaodi goba mohlwekiši.
Ka moka re maloko a lapa la DPW gape ka moka re na le seabo. Badirišani ba rena ba kgokagana ka tokologo le bahlokomedi ba bona le ka bobona.
Bonako
Ka moka re a tseba gore kgoro ye le be le tsebega ka ga Kgoro ya Leta hle e lego Please Wait (PWD) ka ge re be re tšea sebaka go dira dilo. Go ya ka Mokgwa wa Boetapele wa DPW, maloko ka moka a lapa la DPW a tla thuša mahlakore ka moka a mošomo wa wona ka tlhokomelo le ka bonako. Re tla thoma ka go lebelela dikarolo tše di latelago le go di kaonafatša ka bonako:
Matšatši ka moka a bofelo a tla fihlelelwa
Dikopano ka moka di tla thoma ka nako
Mananeo ka moka a dikopano a tla beakanywa le go phatlalatšwa letšatši pele ga kopano.
Maloko ka moka a DPW a tla fihla ka nako dikopanong gape ba ipeakantše
Re tlile go thuša ka ngwalelano ka bonako (diimeili, mangwalo, le ditlhagišo) sebakeng sa matšatši a mabedi a go šoma e sego go feta matšatši a mane a mošomo. Ge se se sa kgonagale ka mabaka a itšego, mongwadi wa ngwalelano o tla tsebišwa ka ga lebaka la tiego gomme tšatšikgwedi le lengwe leo phetolo e tlago holofelwa le tla fiwa.
Megala e ka se lle go feta makga a mane ntle le go fetolwa.
Tiro ya 'ka ntle ga ofisi' mo go Tebelelong (imeili) e swanetše go šomišwa ke motho yo mongwe le yo mongwe yo a tla bego a se ka ofising sebaka sa matšatši a 2 a mošomo
Boineelo
Ka moka ga rena re tla laetša boineelo mo mošomong wa rena le go direla badirelwa ba rena ka bokgoni. Ka moka re swanetše go laetša boineelo boineelo go dira dilo ka bonako, ka go nepagala, ka nako le ka gare ga tekanyetšo.
Maloko ka moka a lapa la DPW ba tla ineela go dira mošomo wa bonako, tirelo ye e nepagetšego le ya go kgotsofatša badirelwa ba ba rena ka moka, go akaretša le badirelwa ba ka gare. Mellwane ye e sa hlakagalego e swanetše go lemogwa le go tlošwa.
Botshepegi
Ka moka ga rena re tla laetša maemo a godimo a botshepegi le go gana le go utulla bomenemene ka mehuta ka moka. Balaodi ba tla kgopelwa go diragatša lefokola bona go hlola botshepegi mo badirišaning ba rena. Ge molaodi ofe goba ofe , go akaretša le DG, a re se sengwe se tlile go dirwa, molaodi yoo o swanetše go kgonthišiša gore boineelo bjoo bo a phethagatšwa gomme ge e le gore boineelo bjoo ga bo fihlelelwe, balaodi ga ba swanela go lewa ke dihlong go boela morago go leloko la badirišani go hlaloša gore ke ka baka la eng tshepetšo yeo e sa fihlelelwa. Tlhompho le go ba le mekgwa e mebotse di hloka gore balaodi ba dire se mo go bona le go badirišani.
Go kgona go tšea sephetho
Ka moka ga rena re swanetše go laetša go kgona go tšea sephetho ka mokgwa woo re re dirago mešomo ya rena ka gona. Ge go na le selo sa go thibela go dira mošomo o itšego, bothata bjoo bo swanetše go lebišwa ka bonako go molaodi wa maleba wa godimo go kgonthišiša gore mollwane o a fokotšwa le go tlošwa. Ka moka ga rena ga re a swanela go kgotlelela ditiro tša go nanya, go se dire selo, kudukudu go hloka bokgoni le go palelwa
Tebanyo ya badirelwa
Re tla ba le tebanyo ya modirelwa go selo se sengwe le se sengwe seo re se dirago. Ka mantšu a mangwe, lehlakore le lengwe le lengwe la mošomo wa rena le swanetše go lebanywa go dinyakwa tša go kaonafatša kabo ya ditirelo go badirelwa ba rena. Mekgwa e swanetše go nyakwa ya go kgonthišiša gore re ikgokaganya le go rerišana le badirelwa ba rena ka mehla go hlola botshepegi le tirišano ye e tiilego. Tirišano ye e tla kgonthišiša gore mathata a rarollwa ka bonako le ka bokgoni pele diphapano di hlagelela.
Tirišanommogo
Ka moka re karolo ya kgoro e tee e bile ka moka re swanetše go thoma go dira re lebantšitšhe tebanyong e tee ya go kaonafatša neelo ya ditirelo mo badirelweng ba rena. Moya wa go seba, wa dihlopha, wa go sola badiršanimmogo, wa go sola ofisi ya tiokologo goba ofisikgolo, goba go sola badirišani ba rena ka neelano ya go fokola ya ditirelo e swanetše go fela.
Ka moka re swanetše go šoma re lebantše mo go rarolleng mathata mmogo go e na le go sola. Ge o katana le karolo ya mošomo wa gago, goeletša o be o kgopele thušo go e na le gore o dule mo sekhutlwaneng gomme o feleletše o šitwa ke go fihlelela tšatši la bofelo leo le ka hlolago lengwalo la kgalemo. A re boledišaneng.
Ge re swanetše go swayana diphošo, e lego seo re swanetšego go se dira, se se swanetše go dirwa gabotse le go hlohleletša ka maikemišetšo a go aga e sego go senyeletša batho goba dikarolo. Ka mantšu a mangwe, ka moka re swanetše go tšwetšapele moya wa mohola wa kganetšano, woo o tlago re thuša go lemoga mathata le go dumelela go ipotšiša gore re ka šomago gore re thuše, go e na le gore re nyake go phala le go kweša motho yo mongwe bohloko. Go romelana diimeili tša go kweša bohloko e bile tša go tšwa tseleng go swanetše go fihla bofelong gomme go ka se ke gwa kgotlelelwa
A re beyeng dikgahlego tša badirelwa ba rena le tša kgoro pele ga kgahlego ya sebele le ya yuniti ya rena. Ka moka re swanetše go šoma re lebišitše nepong e tee gomme re emišo go phadišana le go solana. Ga go yo a swanetšego go dumelelwa go fetišetša go tloša maikarabelo a gagwe gomme a sola motho yo mongwe goba ofisi go e na le gore a nyake tharollo. Badirišani ba Ofisikgolo le balaodi ba swanetše go emiša go sola dilete ka go se šome gape dilete di swanetše go emiša go sola ofisikgolo. A re šomišeng maatla a rena go nyakeng mekgwa e e kaone ya go šoma go e na le go tšwetšapele moya wo o sa lokago wa 'rena le bona'. Badirelwa ba rena ga ba iše selo ka ofisikgolo goba dilete. Bona ba nyaka tirelo kaone go tšwa go rena.
Maitshwaro a bolaodi
Balaodi ba na le karolo e bohlokwa bophelong bja mokgatlo. Ke batho ba beilwego go kgonthišiša gore mošomo o a dirwa. Maitshwaro a bolaodi a na le tlhohleletšo e kgolo mošomong le maitshwarong a badirišani. Karolo ye e tlile go lebelela moya wa bolaodi wo o tlilego go ba gona go DPW. Balaodi ka moka ba tla dumelelana le maitshwaro a a latelago a boetapele:
Mokgwa
Balaodi ba tla šomiša mokgwa wa tshepetšo wa sehlopha. Go ra gore gore balaodi ba tla šoma le badirišani ba bona le balaodimmogo-ka-bona ka mokgwa wa tirišanommogo. Ba tla tšwetšapele tirišanommogo magareng ga diyuniti tše di fapanego le dikarolo ka kgorong. Balaodi ba swanetše go tlogela mokgwatsepetšo wa pušonoši woo o šomišwago bošoleng. Lenaneotlhahlo leo le tlilego thuša balaodi go lemoga mokgwatshepetšo wo o theilwego godimo ga sehlopha, le tlile go hlagišwa.
Balaodi ba tla swara badirišani ba bona ka moka gabotse le ka tlhompho. Balaodi ba tlile go holofelwa go boledišana le badirišani ba bona ka mehla le go šoma nako ye nngwe le ye nngwe. Balaodi ba tla ba mahlahla le go kwišiša gore ke maikarabelo a bona go dira gore badiredi ba šome ka katlego. Balaodi ba tlile go holofelwa go ruta le go thekga badirišani ka moka ba bona e bile ba tlile go kgonthišiša gore tirosepitša le go fa baleloko mešomo go ka se kgotlelwe. Bontši bja bafsa ba tlile go thwalwa bjalo ka barutwana, bathušiwa goba dialogane tša barutantšhwa. Se e tlile go ba maikarabelo a balaodi.
Maitshwaro
Balaodi ba tla itshwara gabotse go ba mohlala mo badirišaning ba bona le mo balaodingmmogo-ka-bona e bile ba tla bontšha mohlala ka maitshwaro a bona magareng ga bona le mo badirišaning ba bona. Maitshwaro a a latelago a tla holofelwa balaoding:
Go theeletša badirišani ba bona
Go hlompha le go fihlelela matšatši a bofelo
Go amogela le go tšwetšapele badirišani, go akaretša dilo tše di bohlokwa bjalo ka go re "ke a leboga" le "dumela" go mohlwekiši ka ofising. Ke dilo tše nnyane tše bjalo ka tše tše di tlilego go ba le kwano ye e lokilego moyeng wa badirišani le go ba le seabo moyeng wa boitshepo le wa tlhomphano
Go lemoga, go thekga le go putsa badirišani bao ba šomilego gabotse mo yuniting/dikarolonng tša bona
Go lemoga mekgwa ya thekgo go badirišani ka moka
Badirišani ba rena ke letlotlo le legolo la mokgatlo wa rena. Le ge e le gore re ga re a swanela go dumelelana ge go e tla mo go sepetšeng badirišani ba rena go netefetša gore matšatši a bofelo a fihlelelwa, re swanetše go swara badirišani ka botshepegi le tlhompho. Re swanetše go dira gore badirišani ba rena ba bone le go kwa gore ba babalela katlego ya bona le kgolo ya bona mo kgorong. Ge batho ba sa dire mošomo wa bona, ba swanetše go tsebagore dikgato tša kgalemo di tlile go tšewa, gape ba swanetše go tseba gore ge ba katana le mošomo wa bona, molaodi o tlile go ba gona go ba thekga le go ba hlahla.
Balaodi ba tla dira gore badirišani ba kgone go kopana le bona go sekaseka mošomo wa bona le taba ye nngwe le ye nngwe yeo e ka ba amago. Balaodi ba swanetše go ba le nako go kopana le badirišani ba bona le go tšea dikgato tša go rarolla mathata a bona. Boetapele ga se fela go laola mošomo eupša ke go ba le kgatlego lehlakoreng le lengwe le le lengwe la bophelo bja mošomi e bile ka nako tše dingwe, se se ka akaretša go theeletša mathata a mošomi
Thulaganyo
Balaodi ba tla netefetša gore nako yee e lekanego e beelwa ka thoko bakeng sa thulaganyo gore go tle go fokotšwe nako ye e hlokegago go rarolla mathata. Balaodi ba tla netefetša gore karolo ye nngwe le ye nngwe le na le thulaganyo ya mošomo ye e rulagantšwego ka nako, gore thulaganyo e fetolwa go ba dithulaganyo mošomo go leloko le lengwe le le lengwe la badirišani. Dithulaganyo tše di swanetše go ba le ditebanyo tše di lokilego, dinako tše di beilwego le go laetša maemo a bonagalago mošomo le didirišiwa tša tekanyo tše di bonagalago. Didirišiwa tše di swanetše go hlagišwa gabotse ke bahlokomedi go badirišani ba bona go netefetša kabo ya ditirelo le go hlahla mošomo.
Balaodi ba DPW ba swanetše go netefetša gore ba ba le nako ye e lekanego ya go lebelela ditaba tša thulaganyo. Se ga se re gore re swanetše go tlhokomologa ditaba tša letšatši ka letšatši eupša re swanetše go šoma ka maatla go dira ditaba tša thulaganyo, tšeo di amanago le phetogo gomme re dutše re ba le nako ya go rarolla ditaba tša letšatši ka letšatši. Mathomo a mabotse ke go aba nako ya rena yeo e sego ka fase ga 60% go lebelela ditaba tša khuetšo ya godimo/tša thulaganyo le 40% ye nngwe mo mehuteng ya ditaba tša letšatši ka letšatši tša khuduego. Maikemišetšo ke go fetola kabo ye go ya ka molawana wa 80/20. Le ge go le bjalo, kabo ye e kganyogegago e sa le kgole ka ge re swanetše go fihlelela boitsepelelo pele. Ka nako tše dingwe selo se bohlokwa bophelong ke tšea sephetho sa gore ke eng se bohlokwa ka nako ye nngwe le ye nngwe.
Go tswalela sekgoba gare ga balaodi le badirišani
Sekgoba gare ga balaodi le badirišani se swanetše e bile se tlile go tswalelwa. Badirišani ba rena ba swanetše go bona bontši bja balaodi ba kgoro ye. Ke tlile go holofela gore ka moka ga rena bjalo ka balaodi re theoge go tšwa 'godimo' gomme re batamele batho ba ba šomago maemong a rena. Dikopano tše mmalwa tša TMC di tlile gape go tshwarwa diofising tša go fapafapana go rarela le naga. Ka nako tša dikopano tšeo maloko a TMC a tlile go ba gona go kopana le badirišani le go boledišana ka ditaba tše bohlokwa le ditlhohlo tšeo di lebaganego kgoro.
Maikarabelo
Balaodi ka moka mo kgorong ba swanetše go ineela go ba le seabo le maikarabelo a feletsego go se sengwe le se sengwe seo se diragalago goba se se sa diragalego dikarolong tša bona gape ga ba dumelelwa go sola badirišani ba bona bakeng sa go se abe ditirelo le mošomo wa maemo a fase. Re lefelwa go kgonthišiša gore badirišani ka moka bao ba lego ka fase ga rena ba kwišiša mešomo ya bona le gore ba thekgwa le go hlokomelwa gabotse gore ba šome.
Maitshwaro a badirišani
Boineelo le bonako
Maloko ka moka a lapa la DPW a tla ineela go fetola mokgwa o ba šomago ka wona go tokafatša boleng bja kabo ya ditirelo go badirelwa ba rena. Se se akaretša go goroga mošomong ka nako e sego go tsarogela lemating ka 15:45, le go dira mošomo wa rena ka bokgoni. Moya wa go šuthišetša se se swanetšego go dirwa lehono gosasa o swanetše go fela. Ge modirelwa a nyaka gore sengwe se dirwe lehono, a se dirwe lehono. Modirelwa yo e ka ba Tona ya gago, DG, ofisi ya tikologo goba modirelwa wa kgoro.
Karolo ya moya wa go goroga nako e šetše e ile mesong, wa go tšea dinako tša go ja tše telele, le wa go sepela ka pela goba nako ye nngwe le ye nngwe ye re e nyakago, o swanetše go fihla bofelong. Go tšea nako ya dijo tša motsegare ya iri moka le go tla ka dijo ka mo ofising, go tšea iri ye nngwe gape o e ja ka nnete ga go amogelege. Le ge balaodi ba sa holofelwe go thoma go šoma bjalo ka maphodisa letšatsi ka letšatši, ba tlile go holofelwa go tšea dikgato tše di hlokegago go netefetša gore badirišani ba hlaloganya ka botlalo gore ka moka re holofelwa go bontšha boporofešenale bjo bogolo. Ga re bana bao ba swanetšego go dišwa.
Kgokagano
Badirišani ba tla leka go hlagiša dikgokagano tša diphišego le dipelaelo tša bona go balaodi ba bona go thibela go nola moko . Ge maloko a akanya gore mohlokomedi wa bona ga a ba hlomphe goba ga a ba sware gabotse, bothata bo swanetše go fetišetšwa go molaodi yo mongwe. Ge e le gore ka moka di a hlolega, k.g.r. go se na le wa balaodi ba bagolo mo karolong yoo a rarollago bothata, bothata bo swanetše go lebišwa ofising ya COO le ya DG. Tshepetšo ye ga e diragale dingongoregong, bjalo ka ditshepedišo tše di tlwaelegilego tša dingongorego di swanetše go latelwa. Badirišani ba tla kgokagana ka bobona ka tlhaompho ye e tletšego.
Maitshwaro a a dumelelwago
Maloko ka moka a badirišani a tlile go tseba melawana ya Batho Pele. Badirišani ba rena ba tlile go dira dilo ka moka tše di bohlokwa tšeo mongmošomo yo mongwe le yo mongwe a di holofetšego go bona. Tšona di akaretša:
o maitshwaro a kgethollo a mohuta wo mongwe le wo mongwe ao a ka se kgotlelelwego o go hlompha badirišani ka wena o go šoma ka maatla le ka tlhokomelo o go bolela ka ga mathata a gago ge o na le ona ao a go thibelago go dira mošomo wa gago o go fihlela matšatši a gago a bofelo ntle le go šalwa morago nako le nako o go atlega le gore ka mehla o nyake mekgwa ya go dira mošomo wa gabotse ka mehla.
Batho ba ba dirago mošomo wa bona ka mokgwa wo o tlwaelegilego ba humana meputso ye kaone kgwedi ye nngwe le ye nngwe. Diponase tša mošomo di tlile go beelwa bao ba šomago go feta ka tlwaelo go na le go goroga mošomong gomme o raloke dikarata khomphutareng. Ka nako tša tshepetšo ya tshekatsheko ya mošomo, motho yo mongwe le yo mongwe o tlile go swanela ke go laetša ka moo a bilego kaone ka gona mošomong wa gagwe, ka moo a šomilego ka gona go feta le ka moo a fetogilego ka gona go ya ka Mokgwa wa Boetapele.
Ditlamorago
Ye nngwe le ye nngwe ya dilo tše re swanetšego go di fetola ke go thoma go kgokagana le maloko ka moka a lapa la DPW le gore go tlile go ba le ditlamorago ge yo mongwe a sa dire mošomo wa gagwe gabotse le ka nako. Se se ama molaodi le modirišani ka go swana. Ge fela re thoma go laola mešomo ya maloko ka moka a lapa la DPW le go itokišetša go hlagiša kgato ya kgalemo mo maemong a go se dire mošomo, re ka se bone phetogo. Ka moka re swanetše go lemoga gore go se dire mošomo go na le moya wo o sa lokago mo kgorong ka bophara e bile ga go amogelege.
Diggato tša kgalemo di swanetše e bile di tlile go tšewa kgahlanong le bao ba šitwago ke go obamela Mokgwa wa Boetapele.
Kgato ya pele ya go laetša boineelo bja go kaonafatša mošomo ke tlhagišo ya mangwalo a go ngwalwa e bile a saenilwego a kgalemo. Balaodi bao ba paletšwego ke go fihlelela letšatši la bofelo gabjale ba kgopelwa go ngwala mangwalo a kgalemo a a lebišitšweng go bona, bakeng sa tshaeno ya ka, ao a tlilego go bewa difaeleng tša bona tša mošomo. Kokotlegelo ya mangwalo a go molaodi yo a itšego e tlile go lebiša go dikgato tša kgalemo. Balaodi ba hlofelwa go thoma go hlagiša ditshepetšo tša mohuta wo bakeng sa dipego tša bona tše di ba lebanego. Ntle le gore ka moka ga rena re thome go lemoga gore go ka se sa ba le mošomo go swana le ka tlwaelo, re ka se sa fetola kgoro ye.
Tshepetšo ya bolaodi
Ke kwa bohloko kudu ge ke lemoga gore dikarolo tše dingwe ka mo kgorong ga di nke di swara dikopano tša bolaodi le tša badirišani. Ka moo motho a sepetšago kgoro goba karolo ntle le go swara dikopano le go kgokagana le 'batho ba gago', go sa mmakatša go bolela nnete.
Balaodi ba tla swara dikopano tša bolaodi mo sebakeng seo se sengo ka fase ga bekepedi gape dikopano tša badirišani di tla swarwa gatee ka kgwedi. Balaodi ba tlile go kgopelwa go boloka metsotso ya dikopano tšeo ka ge ofisi ya ka e tlile go hlokomela le go kgopela kgafetšakgafetša dikhophi tša dikopano tšeo go humana ka moo molaodi yo mongwe le mongwe le karolo di obamelago Mokgwa wa boetapele wa DPW ka gona.
Balaodi ba swanetše go kgonthišiša gore batho ba ba nago le bokgoni bja batho ba thwalwa mo mešomong yeo e nago le sekgoba. Le ge e le gore re swanetše go phema moya wa tshwanelo go tšwa badirišaning ba rena, go swanetše ga tlhokomelwa go kgonthišiša gore badirišani ba rena ga ba tšeelwe fase. Se ga se gore mongwe le mongwe wa maloko a badirišani yoo dirago kgopelo o swanetše go thwalwa, eupša go ra gore batho ba ka gare ba swanetše go fiwa tshepo ya gore dikgopelo tša bona di ile tša sekasekwa ka botlalo le gore motho yoo a feleletšago a thwetšwe o bontšha a le maleba gape a na le tsebo ya go dira mošomo.
Balaodi gape ba tlile go kgonthišiša gore leloko le lengwe le le lengwe la badirišani mo kalong ya lona le amogelwa gabotse, le a hlokomelwa le go tlhahlwa go dira mošomo.
Palo le mohuta wa mathata le ditlhohlo tše re lebaganego le tšona di nyaka gore re dumelele mokgwa wo o lebantšwego go dipoelo go rarolla mathata le go tlogela taolo ya mathata. Go humana ditharollo tša ruri go rarolla mathata bokgoni bjo bo hlokago tsebo ya go sekaseka lebaka la bothata go kgonthišiša tharollo ya maleba e a šomišwa. MMKD (STAR) ke akhronimi ye e emetšego maemo, mošomo, kgato le dipoelo. MMKD (STAR) ke mokgwa wo o lebantšego dipoelong woo o ilego wa šomišwa ke ye nngwe ya dikhamphani tša go atlega tša dino nageng ye, woo o ka bago maleba go DPW. O hlalošwa ka botlalo ka fase.
M. Go ya ka mokgwa wo, ge bothata bo hlagelela, re swanetše go hlagiša bokgoni esego fela go sekaseka maemo/bothata eupša go kwišiša gore ke ka lebaka la eng maemo/bothata bo hlagilego. Se se tlile go re bea maemong a kaone go kgetha tharollo ya maleba e maleba ya bothata.
M. Ge re šetše re kwišišitše ditlholego tša bothata, kgato ye e latelago e ye bohlokwa ke go lemoga mošomo wo bohlokwa wo swanetšego go tšewa. Bjalo ka, mohlala e ka ba go rulaganya kopano ya ka pela le Mokomišinara wa Bosetšhaba wa Tirelo ya Maphodisa a Afrika Borwa (SAPS) goba Ditirelo tša Tshokollo. Le ge go le bjalo, go bohlokwa go kwišiša gore go kopana le Mokomišinara wa Bosetšhaba ga se tharollo ya bothata, eupša ke mošomo wo bohlokwa wo swanetšego go tšewa.
K. Ge re šetše re lemogile mošomo, kgato ye e latelago ye bohlokwa ke go lemoga dikgato tše bohlokwa tšeo o swanetšego go di tšea go rarolla bothata le go kgonthišiša gore dikgato tšeo di hlagišwa gabotse, ge go kgonagala, pele ga kopano le Komišinara ya Bosetšhaba ka mohlaeng wa ka godimo. Dikgato tše di swanetše go ba le dikgato tša go bonagala, dinako, didirišwa tše di hlokagalago go hlokomela tšwelelopele.
D. Dipoelo tšeo o di nyakago le tšona di swanetše go hlagišwa gabotse. Dipoelo tše di tlwaelegilego e ka ba gore Mokomišinara wa Bosetšhaba o tlile go kgotsofala ka gore bjalo DPW e laetša diphetogo mo sebakeng sa dikgwedi tše 4. Ntlha e bohlokwa ke gore dipoelo tše di nyakwago di swanetše go kgona go laetšwa le go lekanywa ka bontši
SMU/Karolo taolo ya tsebo e swanetše go kgonthišiša gore re thoma go kobokanya data ya maleba le mekgwa ye e šomišwago ke dikarolo tše di fapanego go rarolla mathata gore re tle re thome go abelana tshedimošo go e na le go thoma mathomong nako ye nngwe le ye nngwe ge go na le mathata. Ga go na lebaka, mohla, gore ke ka baka la eng. Ofisi ya tikologo ya Pretoria e sa kgone go lekola gore ke ka baka la eng ofisi ya Umtata e rarolotše bothata bjo itšego le go šomiša mokgwa o bjalo go e na le gore go thwalwe khonsalthente go thuša go rarolla bothata bjo bo swanago.
MMKD (STAR) le mekgwa e mengwe ya go rarolla mathata di swanetše go šomišwa go kgonthišiša re thoma go šomiša mokgwa wa saense go lebelela le go rarolla tše dingwe tša ditlhohlo tša rena tša mošomo. Leano la SDI ka kholofelo le tlile go re thuša go šomiša mmotlolo wo o tlilego go ba maleba kudu maemong a rena.
Phethagatšo le tlhokomelo
Mokgwa wa boetapele e tlile go phethagatšwa ka bonako e bile o tlile go ama mang le mang.
Mokgwa wa Boetapele o tlile go tsenywa ka dikonterakeng tša mošomo tša molaodi yo mongwe le yo mongwe kgorong gomm o e tlile go akaretšwa dithulaganyong tša taolo le dithulaganyong tša mošomo tša leloko le lengwe le le lengwe la lapa la DPW. Tlhagišo e dirilwe gore mang le mang a saene Mokgwa wa Boetapele bjalo ka sešupo sa boineelo bja rena bja go fetolela kgoro ya rena bokaoneng.
Dipego tša kotara le kotara di tlile go akaretša karolo goba kgaolo ye e fago dintlha tša ka moo Mokgwa wa Boetapele o phathagaditšwego ka gona ka diyuniting.
Ofisi ya Molaodimogolo: Papatšo le Kgokagano e tlile go hlama thulaganyo ya go hlokomela phethagatšo ya Mokgwa wa Boetapele.
Maloko a TMC a swere diketelo tša tikologo le tša ofisikgolo gomme le lengwe la mabaka a diketelo e ile go humana dikakanyo go tšwa go badirišani ka ga phethagatšo ya Mokgwa wa rena wa Boetapele.
Bofelo
Kgoro e tlile go go sepela sebaka se se telele go ala motheo wa kabo ya ditirelo ye e kaonafaditšwego ge re ka humana metheo ye ka moka gabotse. Le ge go le bjalo, katlego ya kgoro ye e ithekgile godimo ga rena ka moka, go sa šetše morafe, mmala, bodumedi, dikamano goba maemo kgorong ye. Ka moka re ka dira phetogo ge fela re thoma go dira dilo tše di bohlokwa gabotse.
Maatla a rena bjalo ka kgoro a botšong bja go fapafapana, maitemogelong, mangwalong a thuto le dihlopheng tša go fapafapana tša setšo, bodumedi le dikgokaganyo goba maemo ka kgorong. Re swanetše go šomiša diphapano tše ka moka go ikaonafatša. Ka moka ga rena ga re fa ka phošo. Hisitori e re dirile ka moka go rena maloko a lapa la DPW. Bjalo ka lapeng le lengwe le le lengwe, go tlile go ba le dinako tšeo re tlilego go hloya lefelo le le go itshola gore ke ka baka la eng re le fa, eupša re swanetše go lemoga gore go tšwa go rena go dira lefelo le bo ba la mohuta wo re ratago go lona.
Mo go tše, go na le motheo bakeng sa phetogo ya nnete ya DPW. Le ge go le bjalo, ke leloko le lengwe le le lengwe, go sa kgethe morafe, mmala, bodumedi, bong goba tumelo, leo le ka gape le tilego dira phapano. Se ke Mokgwa wa Boetapele, Mokgwa wa DPW.
Na, ... (Leina), ... (Poso) yo a šomago ... (Ofisi, karolo), ke dumela le go itlama go obamela melawana le ditlhagišo tše di tšwelelago ka gare ga Mokgwa wa Boetapele.
... (Tshaeno)
... (Tšatšikgwedi)
BOFELO
Mokgwa wa boetapele wa DPW, mokgwa o moswa wa go dira mošomo. 25 Janaware 2005.
E hlagišitšwe ke ofisi ya DG.
